14 agosto 2012

Dia 6. De Excursión


Despois do almorzo e de prepararnos coas nosas mellores galas, vestidas co churidar e co bindi na fronte, estábamos listas para coller un autobús diferente ao “butterfly” e comezar tamén un día diferente. Chegou o día da excursión!!
Despois dunha hora de viaxe, chegamos ao templo de Thanjavur. Antes de entrar puidemos paliar a calor cun saboroso coco verde. No templo puidemos ver a impresionante arquitectura que poderedes apreciar nalgunha foto.

Acompañadas por Ambalabanan e Sagayaraj visitamos o templo, onde participamos dun ritual propio hinduísta, e despois puidemos coñecer algo máis da relixión, ao mesmo tempo que resolveron as dúbidas e curiosidades que tiñamos acerca do tema.
Xa na saída fomos visitar un elefante, nerviosas e emocionadas coa idea de que nos podía comer, xa que nese momento era a súa hora do xantar. Puidemos sacar unha foto coa súa trompa na cabeza sen ningún percance, todas seguimos vivas!!! aínda que non nos puidemos librar dalgunha que outra baba. Que grande, bonita e boa era a elefanta!!
Chegada a hora do xantar, dirixímonos a un hotel, onde nos deleitaron cunha gran comida típica da India, diferentes salsas onde non podía faltar o arroz con chapati e outros pans tan ricos do país.

Rematada a xornada volvemos para a casa, despois de pasar un gran día.
Aínda queda moita noite por diante…

Vanakkam!