Dia 4: traballo admirable!

Hoxe empezamos a mañá cun xantar con pooris (outro típico pan indio…)

Na primeira parte da xornada atopámonos na oficina co grupo de usuarias do Centro de Atención ás Mulleres, dirixido por Jaibaby.

Contáronnos os casos polos que acudiron o centro, desde temas de violencia de xénero a outros de acoso escolar, mediacións por abandonos ou problemas de herdanza por seren mulleres. O que máis nos chamou a atención do traballo do Centro é a incrible aceptación e emprego que a comunidade fai del. Hai casos nos que acode xente que vai por outras persoas ou logra que as mulleres afectadas acudan. Logo Jaibaby, directora do Centro, contounos como funciona, e que ela soa nos últimos dous anos atendeu 82 casos, ademais de ter un teléfono que atende as 24 horas do dia!, algo impensable en Galiza. A maioría dos casos logran resolvelos directamente ou ben derívanos á policía, pero cando sucede isto  Jaibaby fai o seguimento das tres vistas que se requiren facer. Todas quedamos abraiadas co labor e a entrega dela ao centro.

Ao rematar, despedímonos de María, a presi, con quen tivemos a sorte de compartir este Vanakkam ata hoxe, sniff…

Despois compartimos o xantar tamén xa con Bobby, coordinadora do programa da sida, e que tivemos a sorte de que nos acompañara toda a tarde.

Xa entrada a tarde tivemos a nosa primeira visita turística ao Templo de Rock Fortl dedicado ao deus  Ganesha , e que para chegar ao seu cumio tivemos que subir moitas escadas… moitas!!!, pero valeu a pena porque o que nos esperaba era unha vista sobre toda a cidade de Tiruchirapally. Alí puidemos sentar nas rochas e desfrutar da vista, a brisa que corría e a tranquilidade de estar nesas alturas.

Para rematar o día, Sagayaraj, con todo o mimo e paciencia que o caracteriza acompañounos xunto con Bobby por diferentes tendas tradicionais onde puidemos mercar  agasallos que seguramente serán para algunhas das persoas que estades a ler esta crónica!

Por fin de volta na nosa casiña aquí en Trichy… ducha, cea, enzoufarnos de repelente de mosquitos!

Vanakkam!!!