09 agosto 2012

DIA 1 VANAKKAM 2012: o encontro


O impacto da chegada á India foi diferente en cada unha, pero todas sentimos a emoción de vernos xa aquí e observar as cores, os ruídos, as xentes, os sabores, o caos… unha explosión para os sentidos.
No noso primeiro día de contacto co persoal  da organización PDI, coñecemos a maioría das que forman parte do Proxecto de Empoderamento de Mulleres. A xuntanza foi nas nas propias oficinas, coñecemos as persoas traballadoras e responsables dos diferentes proxectos, e brevemente nos contaron en que consiste o seu traballo, todo de campo, e con total claridade o labor feito.

En todos os proxectos sorprendeunos a claridade nos obxectivos e accións levadas a cabo tanto a curto, medio coma longo prazo. Outro dos datos que resaltamos é coñecer como nun dos traballos estase logrando a redución brutal de casos de transmisión de VIH en mulleres embarazadas, sendo fai anos Támil Nadu a zona onde mais transmisións había e agora despois do labor feito, pasou a estar xa no cuarto lugar de toda a India en número de transmisións.

Pola tarde, tivemos a posibilidade de visitar in situ tres grupos de aforro.
Co primeiro grupo asistimos á reunión ordinaria que facían, onde vimos como se concederon dous créditos a mulleres. Vimos o seu funcionamento, a ríxida xestión, o bo clima do grupo, e como algunhas delas resaltaban que desde que están no grupo de aforro fan cousas que non facían antes: saír da casa, ir ao banco, xestionar elas mesmas os cartos que solicitan, e participar e xestionar así activamente a economía familiar.

Na xuntanza cos seguinte dous grupos, cando nos estaban contando o funcionamento e  as características de cada un, desatouse unha choiva que a todas nos levou a pensar que sentimos o monzón!, aínda que varias das mulleres nos contaron que estaban moi contentas porque levaban moito tempo de seca e que nós lles leváramos a choiva coa nosa visita!

En definitiva despois deste primeiro contacto con PDI e as persoas traballadoras e usuarias quedámonos co fabuloso trato, o coidado e o mimo co que nos tratan, coa súa hospitalidade constante e o incrible traballo que se se está a facer.

E sobre a comida, algunhas están encantadas co picante e as especies, e outras intentámolo…
VANAKKAM!!!!!

3 comentarios:

Anónimo dijo...

disfrutade moito con cada sentido, esa viaxe estará en vós sempre!

un bico!

Blanca dijo...

Como me gustaría estar alá con vós! Sacádelle o máximo partido a esa experiencia tan fermosa!

Anónimo dijo...

Esta viaxe formativa foi unha das mellores experiencias da miña vida, e seguro que tamén a será da vosa. Aproveitádea todo o que poidades! Gracias a Tamil Nadu e a toda a súa xente por ensinarme tanto.
María